Таварыства беларускай мовы імя Ф.Скарыны

Мінск
Беларуская English
Увайсьці або зарэгістравацца
навіны

Выдавецтва "Харвест" запусціла маштабны праект па выданні дзіцячых кніг на беларускай мове

На сайце nn.by з'явілася добрая навіна пра тое, што выдавецтва "Харвест" запусціла маштабны праект па выданні кніг на беларускай мове. За апошні год выйшла з тузін серый, што ахопліваюць мастацкую і навучальную літаратуру для дзяцей і падлеткаў.
Рыхтуюцца да выхаду энцыклапедыі пра жывёл, народы свету, дыназаўраў, свет вакол нас — для дзетак сярэдняга школьнага ўзросту.

Кнігі гэтых серый могуць прыдацца як для чытання ў вольны час, так і ў якасці дадатку да матэрыялу, што вывучаецца ў школе. Каляровыя малюнкі і аўтарскія ілюстрацыі захопліваюць увагу і робяць гэтыя кнігі цудоўным падарункам.
Над перастварэннем тэкстаў на беларускую мову працуюць вядомыя беларускія пісьменнікі і паэты, якіх вылучае любоў да беларускага слова і творчы падыход. Гэта Міраслаў Адамчык, Наталка Бабіна, Алесь Емяльянаў-Шыловіч, Наста Кудасава.

 

2018.08.03 0

Петыцыі на petitions.by

На сайце petitions.by ёсць некалькі цікавых петыцый на беларускай мове. Адна з іх будзе накіраваная ў Магілёўскі гарвыканкам і заклікае ўшанаваць память аб Магілеўскім паўстанні 1661 г. Аўтары прапануюць усталяваць памятную шыльду аб паўстанні на будынку гарадской Ратушы у Магілёве ( менавіта адтуль пачалося паўстанне ) і арганізаваць і правесці конкурс на выгляд шыльды і яе тэкст.Падпісаць петыцыю можна тут.

Таксама звяртае на сябе ўвагу петыцыя, у якой яе стваральнік звяртае ўвагу на тое, што "Беларусы саромяцца карыстацца роднай мовай пры размове". Петыцыя будзе накіраваная ў некалькі міністэрстваў і заклікае "зрабiць увод ва штодзённы ўжытак рэкламы ў большай ступенi на беларускай мове, i такcама распрацаваць праект яе ўжывання сярод беларусаў". Таксама стваральнік задаецца пытаннем: "Хіба мы не заслужылі чуць родную мову ў сваёй жа ўласнай краіне?"

Азнаёміцца з поўным тэкстам, абмеркаваць і падпісаць петыцыю можна тут.

2018.08.03 0

Другі міжнародны фестываль SPRAVA ужо ў гэтыя выходныя! (абноўлена)

У вёсцы Белая Царква (165 км ад Мінска) 4-5 жніўня пройдзе Другі  міжнародны фестываль-узаемадзеянне з гістарычным і прыродным ландшафтам Беларусі сродкамі сучаснага мастацтва і музыкі SPRAVA. Квіткі ад 10 BYN (1-дзённы білет на 5 жніўня) да 40 BYN (3-дзённы білет 3-5 жніўня+харчаванне).

SPRAVA - міжнародны фестываль у вёсцы Белая Царква на маляўнічым паўвостраве каля руін храма ХVI стагоддзя. Там выступіць больш за 10 гуртоў і артыстаў, некалькі класічных аркестраў і тэатраў. Хэдлайнерамі стануць беларускае этна-трыа "Троіца" і беларуска-польскі этна-джаз-квінтэт Ulyanica.

Галоўная будаўнічая падзея SPRAVA сёлета - устаноўка незвычайнага пляжу. Сюды будзе прышвартоўвацца пабудаваная падчас травеньскай міжнароднай школы архітэктуры SESAM 2018 Ex Nihilo плывучая платформа PLATFORMIX, на якой адбудуцца выступы класічных музыкаў. Акрамя таго, беларускія мастакі ўзвядуць некалькі малых лендарт-аб'ектаў у прахалодным дубовым гаі паўвострава.

2018.08.03 0

Запрашаем на кінапрагляд фільма ў беларускай агучцы "Час"

Прагляд фільма "Час" пройдзе ўжо сёння, 2 жніўня, з 18:00 у офісе ТБМ (вул. Румянцава, 13). Уваход вольны.

Глядзець будзем амерыканскі фантастычны фільм 2011 г. рэжысёра Эндру Ніколь "Час" з Джастынам Тымберлейкам, Амандай Сэйфрыд, Кіліянам Мёрфі ў галоўных ролях!

Сардэчна запрашаем у свет, дзе час стаў адзінай валютай, дзе людзі генетычна запраграмаваны так,  што ў 25 гадоў перастаюць старэць. І вось, багацеі становяцца практычна бессмяротнымі, а беднякі асуджаны змагацца за жыццё.
Уіл, бунтар з гета, несправядліва абвінавачаны ў забойстве з мэтаю крадзяжа часу і вымушаны захапіць закладніцу, дый падацца наўцёкі. Штохвілінна рызыкуючы жыццём яны ўдвух становяцца сапраўдный зброяй у барацьбе з сістэмай. Але ж вось пытанне: хто каго?

Агучана пры падтрымцы праэкта КінаКіпа.
Фільм агучаны суполкай Gavarun_by, тэкст чыталі: Адам Трыпутнік, Таша Мурзэнштольц 

 

2018.08.02 0

Запрашаем на курсы ва ўніверсітэце імя Ніла Гілевіча. Зацверджаны парадак прыёму на курсы

Універсітэт імя Ніла Гілевіча з верасня 2018 г. пачынае падрыхтоўчыя курсы для вучняў старэйшых класаў (10, 11 класы), студэнтаў, а таксама для ўсіх, хто хоча ўдасканаліць свае веды і падрыхтавацца да ЦТ і паступлення ў ВНУ, па наступных прадметах: гісторыя Беларусі, матэматыка, фізіка, хімія, беларуская, англійская, нямецкая і (пры наяўнасці попыту) французская мовы.

Выкладчыкі курсаў маюць багаты досвед працы ў школах, ліцэях і ВНУ. Некаторыя з іх кандыдаты і дактары навук, дацэнты і прафесары. Яны рыхтуюць трох- і шасцімесяцовыя курсы. На курсах, якія будуць доўжыцца 3 месяцы, заняткі будуць праходзіць два разы на тыдзень па тры гадзіны на дзень. На курсах працягласцю шэсць месяцаў заняткі будуць праходзіць раз на тыдзень (па суботах) таксама па тры гадзіны на дзень. Колькасць навучэнцаў у кожнай групе – не больш за 10-12 чалавек.

Кожны курс уключае ў сябе тры прадметы на выбар навучэнца ў любой камбінацыі (гісторыя Беларусі, матэматыка, фізіка, хімія, беларуская, англійская, нямецкая і французская мовы). Кошт любога курса ўсяго 200 BYN (і за трох-, і за шасцімесяцовы курс).

Больш інфармацыі далей.

2018.08.02 0

Альгерд Бахарэвіч тлумачыць, чаму “вышыванка” – гэта прафанацыя

На сайце Цэнтра новых ідэй выклалі цікавы артыкул пісьменніка і перакладчыка Альгерда Бахарэвіча пра "вышываначную" ідэнтычнасць.

Шмат хто захапляецца “вышыванкамі”, якія запоўнілі нашыя гарады. Беларускія ўзоры закрасаваліся на майках Аляксандра Лукашэнкі і яго 20-гадовых праціўнікаў – і гэта падабаецца, бадай, усім, апроч Альгерда Бахарэвіча.

Прыводзім артыкул цалкам.

2018.08.02 0

Унікальны анімацыйны фільм "Падымаецца вецер" цяпер па-беларуску! (абноўлена)

У пятніцу і гэтыя выходныя, 3-5 жніўня, з 19:00 у пятніцу і з 16:30 у суботу і нядзелю ў кінатэатры "velcom cinema" (Мінск, вул. Пятра Мсціслаўца, 11) адбудуцца дадатковыя паказы неверагодна кранальнага развітальнага твора Хаяо Міядзакі "Падымаецца вецер". Колькасць квіткоў абмежаваная, спяшайцеся набыць: afisha.tut.by/film/padymecca-vecer

Пераклад і паказы ладзіць kinakong.by
Акрамя паказаў у кінатэатрах фільмы з беларускай агучкай могуць глядзець карыстальнікі voka.tv ад аператара вэлком.

2018.08.01 0

Gavarun_by збірае сродкі на агучку развівальна-забаўляльнай стужкі "Tiny Love" для самых маленькіх дзетак (абноўлена)

Суполка агучвання фільмаў і мультфільмаў на беларускую мову gavarun_by запрашае паўдзельнічаць у зборы ахвяраванняў для агучвання па-беларуску выдатнага мультфільма Tiny Love - развівальна-забаўляльнай стужкі для самых маленькіх дзетак (ад трох месяцаў да трох гадоў). Мультфільм знаёміць з навакольнымі прадметамі, формамі і колерамі, насычаны песнямі і інтэрактыўнымі элементамі. 
Для лакалізацыі запланаваны 2 серыі па 29 хвілін кожная, рэліз на ютуб-канале Gavarun_by. 
Патрэбная сума – 350 рублёў (на дадзены момант сабрана 50 рублёў), збіраюць да 15 жніўня. Ахвяраванні адпраўляць на картку VISA 4585 2161 1506 8873 (тэрмін дзеяння 05/20, рахунак BY39 ALFA 3014 7231 2100 5027 0000), падрабязнасці тут.

Нядаўна суполка ўжо скончыла збор сродкаў на агучванне класічнага мультсерыяла пра Мікі Маўса па-беларуску, сабраўшы 1225 рублёў, і ўжо пачала працу. Паглядзець агучаныя серыі можна на ютуб-канале суполкі.

Таксама ў офісе ТБМ (вул. Румянцава, 13) 31 ліпеня ("Фантастычныя істоты і дзе іх адшукаць"), 1 і 2 жніўня ("Вэрхал у галаве" і "Час") ладзяцца прагляды фільмаў у агучцы gavarun_by. Прагляды будуць пачынацца а 18-й, уваход вольны. 

 

2018.08.01 0

Дакументы 1995 г. з уласнага архіва гісторыка Алега Трусава пра адстойванне нацыянальнай сімволікі

У архіве гісторыка Алега Трусава знайшліся важныя гістарычныя дакументы пра перыяд адстойвання дзяржаўных сімвалаў герба "Пагоня" і бел-чырвона-белага сцяга пасля рэферэнума 14 мая 1995 г.

Падаем сканы дакументаў. У адным ад 26 мая 1995 г. Алег Трусаў (тады старшыня камісіі па забеспячэнню адзінай палітыкі выкарыстання дзяржаўных сімвалаў Рэспублікі Беларусь пры Прэзідыуме Вярхоўнага Савета Рэспублікі Беларусь) звяртаецца ў пракуратуру з просьбай разгледзець сітуацыю са знявагай законных Дзяржаўнага сцяга і Дзяржаўнага герба Рэспублікі Беларусь і незаконнага іх змянення. У адказе з пракуратуры ад 23 чэрвеня 1995 г. крымінальнага складу злачынства выяўлена не было.

Наступным крокам паслужыла складанне Заявы Грамадскага камітэта абароны беларускай нацыянальнай гістарычнай сімволікі за захаванне адпаведных дзяржаўных сімвалаў. 64 вядомыя асобы, мастакі, літаратары, навукоўцы, грамадскія дзеячы і палітыкі падпісалі заяву. Сярод іх народныя паэты і пісьменнікі Рыгор Барадулін, Ніл Гілевіч, Янка Брыль, Васіль Быкаў і многія іншыя.

Азнаёміцца з дакументамі можна далей.

2018.08.01 0