Адкрыццё адразу 3 выставаў

У сераду 18 ліпеня ў 17:00 у Палацы мастацтва (вул. Казлова, 3) адкрываецца адразу 3 выставы. Усе яны прадоўжацца да 29 ліпеня. Наведаць выставы можна будзе штодзень, апрача панядзелка, з 11:00 да 19:00.

Адна з выставаў прысвечана 90-годдзю з дня нараджэння Гаўрылы Вашчанкі. Яна ўключае ў сабе найбольш цікавыя работы з калекцыяў НММ РБ, Гомельскай карціннай галерэі Г. X. Вашчанкі і калекцыі сям’і мастака.

Таксама адбудзецца адкрыццё юбілейнай выставы Веранікі Віткоўскай – мастачкі-манументалісткі, жывапісца, графіка, педагога.

Яшчэ адбудзецца адкрыццё арт-праекта "Семачкі". Ідэя праекта не прадугледжвае строгіх абмежаванняў для яго ўдзельнікаў і дае ім поўную свабоду для самавыяўлення. Мастакі вольныя імправізаваць літаральна ва ўсім: пачынаючы ад перавагі відавой разнастайнасці выяўленчага мастацтва, выбару матэрыялу, тэхнікі выканання і завяршаючы аўтарскай інтэрпрэтацыяй сэнсавай фабулы выставы. Мабыць, адзіным патрабаваннем да ўдзельнікаў з’яўляецца выдатнае пачуццё гумару, добры густ, прасторавае мысленне і прафесіяналізм.

2018.07.16 0

Заклікаем падаваць заявы ў 1 беларускамоўны клас гімназіі №4 у Баранавічах

У чацвер 12 ліпеня ў актавай залі гімназіі №4 г. Баранавічы адбылася сустрэча бацькоў, якія хочуць аддаць сваіх дзяцей у першы беларускі клас, са старшынёй ТБМ, дэпутаткай Палаты Прадстаўнікоў Аленай Мікалаеўнай Анісім. На сустрэчы было 8 з 10 бацькоў, якія падалі заявы, таксама прысутнічала намесніца аддзела адукацыі гарвыканкама, дырэктар гімназіі і дырэктар школы №16, сябры Баранавіцкай арганізацыі ТБМ.
Вяла сход Алена Анісім. Усе прысутныя выклалі свае пазіцыі. Абмеркавалі аргументы “за” і “супраць”. У беларускі клас гімназіі №4 пададзена 10 заяваў. Атрымліваецца некамплектны клас. Таму ўлады хочуць накіраваць гэты клас у менш загружаную школу № 16, бо ў гімназію пададзена заяваў больш, чым ёсць месцаў. Трэба, каб у беларускі клас набралася больш за 20–25 заяваў, тады ён будзе адчынены ў гімназіі № 4. Запрашаем бацькоў да 28 жніўня падаваць заявы ў першы беларускі клас. 

2018.07.16 0

Прайшла другая лекцыя "Гістарычнай школы" з Алегам Трусавым (абноўлена)

На другую лекцыю "Гістарычнай школы" з Алегам Трусавым на тэму "Менск і Мінск у ХІХ-ХХ стст.", якая прайшла 12 ліпеня ў офісе ТБМ, прыйшло за 30 чалавек (змясцілі ўсіх!). На лекцыі былі паказаны фільмы Алеся Краўцэвіча ( тэлеканал Белсат з серыі "Загадкі беларускай гісторыі" "Менск. Ад "Пляцу Волі" да "Плошчы Свабоды" і "БНР і Менск. Нараджэнне новай сталіцы"), былі паказаны ўнікальныя здымкі Алега Трусава, зробленыя на вуліцах Менска ў канцы 70-80-х гадах мінулага стагоддзя.

Наступныя лекцыі будуць прысвечаныя Лідзе на тэмы "Ліда. Горад" і "Ліда. Замак", якія пройдуць 8 і 9 жніўня з 17:30 да 19:00.

Адрас: офіс ТБМ (вул. Румянцава, 13). Уваход вольны.

2018.07.13 0

Навіны symbal.by

У краме з'явіліся навінкі (напрыклад, усе кнігі Алексіевіч па-беларуску) і многа зніжак (напрыклад, Кніга Вайцюшкевіча "Простыя словы" ўсяго 11 рублёў).

А таксама толькі для атрымальнікаў рассылкі будзе штотыдзень стварацца промакод са зніжкай на адзін з тавараў. Гэтым разам -20% на ЎСЕ цішоткі (каб даведацца промакод, неабходна падпісацца на навіны крамы на сайце). Прома-код дзейнічае да 20 ліпеня. Яго трэба ўвесці пры замове на сайце ці сказаць прадаўцу ў краме Машэрава, 18.

2018.07.13 0

Апошні прыстанак Каліноўскага

На сайце svaboda.org прыведзены цікавы матэрыял Сяргея Дубаўца пра сітуацыю з парэшткамі паўстанцаў 1863-1864 гг., сярод якіх і парэшткі Канстанціна Каліноўскага, актыўнага ўдзельніка і аднаго з кіраўнікоў вышэйзгаданага паўстання.

У матэрыяле расказваецца, дзе будуць перазахаваныя знойдзеныя на Замкавай гары ў Вільні парэшткі павешаных і расстраляных паўстанцаў, расказваецца пра гісторыю гэтага месца (могілак Роса), прыводзяцца цікавыя факты адносна сітуацыі з перазахаваннем.

2018.07.13 0