ІІІ Міжнародны open-air форум "Міжмор’е літаратур" ужо ў гэтыя выходныя! (абноўлена)

У арт-вёсцы Каптаруны 28-29 ліпеня 2018 г. аграсядзіба «Арт-вёска Каптаруны» і Літаратурны дом «Логвінаў» ладзяць ІІІ Міжнародны open-air форум «Міжмор’е літаратур». Тэма Форума гэтага года — нябачныя межы.

Госці фестывалю:

Юлія Фядорчук (Польшча), Марыюс Бурокас, Юргіта Йяспанітэ (Літва), Мэхдзі Марадпур (Берлін), Махмуд Хасэйні Сад (Іран), Святаслаў Памяранцаў (Meridian Czernowitz), Астап Слывынскі (Украіна), Уладзімір Арлоў, Альгерд Бахарэвіч, Ірына Герасімовіч, Артур Клінаў, Ігар Логвінаў, Павал Касцюкевіч, Юля Цімафеева, Андрэй Хадановіч, Ганна Янкута (Беларусь)

Госці адмысловай праграмы: Пафнуцій Казюкян (Грёзы Пафнутия), Антаніна Слабодчыкава і Юра Дзівакоў-Душэўскі.

Зарэгістравацца можна тут.

2018.07.26 0

Працягваецца рэгістрацыя на моладзевы летнік на радзіме Васіля Быкава (абноўлена)

У Бычках (на радзіме Васіля Быкава) 14-19 жніўня пройдзе моладзевы летнік “Брэнд беларускай культуры”, на які запрашаецца моладзь ад 18 да 30 гадоў. Удзельнікі змогуць сумясціць адпачынак, нефармальнае навучанне на свежым паветры ды працу па ўладкаванні тэрыторыі каля дома-музея пісьменніка. 

Удзельнікаў летніка чакае насычаная цікавая праграма ды атмасфера. У межах летніка ўдзельнікі:

1. Будуць мець сустрэчы і лекцыі з беларускімі творцамі і грамадскімі ды культурнымі дзеячамі;
2. Займацца ўпарадкаваннем школы В. Быкава і прыборкай тэрыторыі;
3. Прымуць удзел у распрацоўцы канцэпцыі, ініцыятываў і праектаў па прасоўванні беларускай культуры;
4. Будуць мець магчымасць адпачыць, завесці новыя знаёмствы, пазнаёміцца з прыродай і культурай мясцінаў Быкава.

Арганізатары забяспечваюць праезд і харчаванне ўдзельнікаў. Пражываць яны будуць у намётах на тэрыторыі сядзібы.

Удзельнікам трэба запоўніць анкету да 5 жніўня.

Дадатковыя пытанні можна задаць праз мэйл: BelovABelyj@gmail.com.

2018.07.26 0

Дыскусія ў Магілёве "Што варушыць Магілеў?"

У чацвер 26 ліпеня ў Цэнтры “Кола” (зав. Чкалава, 16) сумесна з 34 multimedia magazine з 18:00 пройдзе дыскусія “Што варушыць Магілёў”.

У дыскусіі возьмуць удзел:
– Дзяніс Васількоў (мадэратар) – Цэнтр “Кола”;
– Тацяна Анташук – Цэнтр Гарадскіх Ініцыятываў;
– Ірына Снапкова – TED x Магілёў;
– Раман Жыгараў – Гурт Akute;
– Аліна Скрабунова – Оўпэн-эйр кінапаказы ў Магілёве.
Далучайцеся, каб адкрыта абмеркаваць, што з сябе ўяўляе горад цяпер, якім можа быць заўтра і навошта наогул прыязджаць у Магілёў.

2018.07.25 0

Сёння дзень народзінаў маладога пісьменніка Кірыла Стаселькі. Можна павіншаваць, набыўшы яго кнігі

Кірыл Стаселька, беларускі празаік, супрацоўнік Нацыянальнай акадэміі навук Беларусі і актыўны грамадскі дзеяч, сёння, 25 ліпеня, адзначае дзень народзінаў. Павіншаваць Кірыла можна па-рознаму. Напрыклад, набыўшы яго кнігі ў друкаваным ці электронным выглядзе. На сайце kniharnia.by ёсць адразу 2 кнігі пісьменніка: "Marginalis" і "Дзіцячы маніфест".

"Marginalis" — насычаны i захапляльны фiласофскi раман, дзеянне якога ахоплiвае больш за чатырыста гадоў, паўтары сотнi персанажаў i дзясяткi краiн. Гэта пазл з мноства сюжэтных лiнiй, фiласофскiх ды псiхалагiчных матываў, якiя складаюцца ў адно цэлае. Раман “Marginalis” быў прызнаны самым насычаным творам беларускай літаратуры. У рамане аб'ёмам 251 944 знакі сустракаецца не менш за 136 персанажаў. Рэкорд быў зафіксаваны беларускім аналагам Кнігі рэкордаў Гінэса – праектам “Рэкорды Куфара”.

Дэбютная кніга Кірыла Стаселькі "Дзіцячы маніфест" — цікавая спроба аўтара знайсці межы і магчымасці чалавечай свабоды ў грамадстве, зразумець асаблівасці Рубікона, які пралягае паміж нармальнасцю і вар’яцтвам. У кнізе вы сустрэнеце французскага пісьменніка, цела якога знутры разрываецца ад ціску ўласнага Эга, чалавека, чыя рэальнасць і сон зліваюцца, мастака, чыя галава аддзялілася ад цела, ды шмат іншых герояў, якія па-рознаму намагаюцца напісаць маніфест свайго "Я".

2018.07.25 0

На ulej.by збіраюць на друк настольнай гульні "Падарожжа па Беларусі"

Стварыла праект Наталля Галко, якая піша пра гульню для дзяцей наступнае: "Галоўная дзеючая асоба ўсіх гульняў і вядучы – гэта Смоўжык. Ён дасканала ведае ўсе правілы гульняў, дапамагае бацькам заахвочваць дзяцей і апавядае аб усіх цікавостках роднай мовы. Нават сама ракавінка Смоўжыка з’яўляецца ўвасабленнем таго каштоўнага, што ёсць у кожнага з нас. Што гэта? Дзеці, сям’я, Радзіма, родная мова…"

Аўтарка абяцае, што "гульня павялічыць цікавасць дзяцей да роднай мовы, дапаможа ў яе вывучэнні, а таксама – дасць магчымасць усім жадаючым бавіць вольны час па-беларуску."

На праект патрабуецца сабраць 3 875 BYN, ужо сабрана 4% ад гэтай сумы, а да канца кампаніі па зборы сродкаў 54 дні.

2018.07.25 0

Адказ Алега Трусава на зацемку ў "Лідскай газеце". "Лідская газета" даслала свой адказ на гэта (абноўлена 25 ліпеня)

На зацемку ад 27 чэрвеня 2018 г. у "Лідскай газеце" №51 Антона Быстрыцкага "Интерес в этом деле скорее личный" датычна прыватнага ўніверсітэта імя Ніла Гілевіча Алег Трусаў дае разгорнуты адказ. 

Галоўны рэдактар “Лідскай газеты” К. А. Серафіновіч нядаўна прыслала свой адказ Алегу Трусаву. Азнаёміцца можна далей.

2018.07.25 0