Таварыства беларускай мовы імя Ф.Скарыны

Мінск
Беларуская English
Увайсьці або зарэгістравацца
Мясцовыя арганізацыі

Лідская гарадская арганізацыя ТБМ

навіны

Турызм і беларуская мова ў Лідзе

2014.06.18 0

  Выява з сайта www.delta.grodno.by.

Паціху - паціху Ліда становіцца буйным турыстычным цэнтрам. Нам далёка да Нясвіжа або Міра, але мы ведаем, да чаго імкнуцца.

У Ліду штодзённа едуць экскурсіі з Беларусі і з-за мяжы. Прымаюць гасцей і вядуць экскурсіі па замку і па горадзе ў асноўным дзве структуры: Лідскі гістарычна-мастацкі музей і прыватная турыстычная фірма “Адрас лета” (былы “Святавіт”).

Экскурсіі ў Лідзе вядуцца на розных мовах. Часцей за ўсё гэта руская мова, але...

У Лідскім гістарычна-мастацкім музеі экскурсіі вядуць 11 чалавек, з іх:

- толькі па-беларуску экскурсіі вядзе 1 чалавек - Алесь Хітрун;

- па-беларуску і па-руску (у адпаведнасці з заяўкай) вядуць экскурсіі 7 чалавек з улікам дырэктара музея Ганны Драб, якая вядзе экскурсіі толькі для асабліва важных дэлегацый;

- толькі па-руску вядуць экскурсіі 3 чалавекі;

- 1 чалавек можа весці экскурсіі па-польску;

- 1 чалавек можа весці экскурсіі па-англійску.

У турыстычнай фірме “Адрас лета” экскурсіі вядуць 9 чалавек:

- па-беларуску і па-руску вядзе экскурсіі 1 чалавек;

- яшчэ два чалавекі могуць весці экскурсіі па-беларуску, але робяць гэта вельмі рэдка;

- 1 чалавек можа весці экскурсіі па-польску;

- 1 чалавек можа весці экскурсіі па-літоўску;

- 1 чалавек можа весці экскурсіі па-англійску;

Асноўная маса экскурсій гэтай фірмай праводзіцца па-руску, але ў якасці кампенсацыі анімацыйнае прадстаўленне “Вяселле Ягайлы”, якім фірма забаўляе турыстаў, ідзе толькі па-беларуску, не гледзячы ні на што, не зважаючы, адкуль дэлегацыя.

Вельмі часта ў турыстычных заяўках мова экскурсій не абгаварваецца, і тут важная пазіцыя экскурсавода. Так Алесь Хітрун заявіў літоўскай групе, што ён вядзе экскурсіі толькі па-беларуску, калі іх гэта не задаволіць, то экскурсавода можна замяніць. На гэта літоўцы адказалі зусім нечакана:

- Вядзіце па-беларуску. Гэта і нашая мова таксама. Калі што не зразумеем - перапытаем.

А адна жанчына на літаратурнай беларускай мове дадала:

- Чуць што, перакладу.

Так жа ахвотна згаджаюцца на беларускую мову палякі.

Такім чынам з 20 лідскіх экскурсаводаў мы маем 11 здольных працаваць па-беларуску і 9, якія гэта рэгулярна робяць.

На жаль, пакуль параўнаць няма з кім, але няхай гэты артыкул будзе першым, а іншыя гарады параўнаюць сваю сітуацыю з лідскай.

Станіслаў Суднік


← вярнуцца ў навіны