Кандыдат у дэпутаты Палаты прадстаўнікоў Нацыянальнага сходу Рэспублікі Беларусь Алена Анісім з серады 31 жніўня па нядзелю 4 верасня правяла шэраг сустрэч у Стаўбцоўскай выбарчай акрузе № 70.

У сераду 31 жніўня  яна сустракалася з выбаршчыкамі ў Новым Свержні.

У чацвер 1 верасня раніцай - выступіла перад настаўнікамі, вучнямі і іх бацькамі на ўрачыстай лінейцы ў сваёй роднай школе ў Горках, увечары - размова з выбаршчыкамі ў Рубяжэвічах.

У пятніцу  2 верасня яна правяла дзве сустрэчы ў Гарадзеі, адна ў школе № 2, другая - у школе-інтэрнаце.  На гэтыя сустрэчы з Мінску прыехалі падтрымаць кандыдата Алену Анісім яе давераныя асобы - Марыя Міхайлаўна Міцкевіч, Вячаслаў Раковіч, а таксама сябар і аднадумца Алег Гайдукевіч (з НАН Беларусі). Вечарам была сустрэча з выбаршчыкамі ў  Коласава.

У суботу 3 верасня Алена Анісім прыняла ўдзел у свяце вёскі Дружная ў Стаўбцоўскім раёне, дзе мела магчымасць выступіць перад жыхарамі і гасцямі вёскі Дружная.

У нядзелю раніцай адбыўся пікет у падтрымку Алены Анісім у Нясвіжы.
Падчас сустрэч выбаршчыкі задавалі розныя пытанні. Вось некаторыя з іх:

-        Ці верыце Вы, што правільна палічаць галасы? – Спачатку трэба прагаласаваць, бо калі Вы не прагаласуеце за мяне, то і лічыць няма чаго. Чым больш людзей аддасць свае галасы за маю кандыдатуру, тым больш шансаў стаць дэпутатам.

-        Якім Вы бачыце стан сельскай гаспадаркі ў раёне і ў краіне ў цэлым? – Я магу не вельмі аб’ектыўна ацаніць стан сельскай гаспадаркі, але мая думка такая: недахопу ў ежы ў нас няма. Але ёсць пытанне якасці прадуктаў. А гэта змушае нас больш звяртаць увагі на пытанні экалогіі.

-        У нас сёння яшчэ ёсць спецыялісты і людзі ахвотныя працаваць на зямлі. А хто за намі? Што з гэтым рабіць? – Я думаю, што варта ў школах практыкаваць семінары-вучобы з бізнес-спецыялістамі, якія змогуць дапамагчы школьнікам выявіць і развіць схільнасці да прадпрымальніцтва, дапамогуць сфармуляваць і рэалізаваць цікавыя задумы, у тым ліку і ў сельскай гаспадарцы.

Таксама на мінулым тыдні кандыдат у дэпутаты Палаты прадстаўнікоў Нацыянальнага сходу Рэспублікі Беларусь Алена Анісім разам з сваімі даверанымі асобамі Наталляй Плакса і Валерам Дранчуком наведала ў Нясвіжы пляменніцу Янкі Купалы Ядвігу Іванаўну, якой у гэтым месяцы споўніцца 96 гадоў.

Штаб кандыдата ў дэпутаты Палаты прадстаўнікоў Алены Анісім