Таварыства беларускай мовы імя Ф.Скарыны

Мінск
Беларуская English
Увайсьці або зарэгістравацца
Мясцовыя арганізацыі

Пінская раённая арганізацыя ТБМ

навіны

Былы старшыня Пінскай гарадской арганізацыі ТБМ Савіч Валер

2015.03.20 0

Пінская рэгіянальная арганізацыя была створана 9 чэрвеня 1991 г.

Устаноўчая канферэнцыя праходзіла ў актавай зале Пінскай педагагічнай вучэльні. Ініцыятарамі стварэння арганізацыі былі сябры дэмакратычных арганізацый, некалькі настаўнікаў і грамадзян, якія працавалі на розных прадпрыемствах горада. Усяго прысутнічала звыш 50 чалавек. Старшынёй рады абралі сп. Святлану Дзмітрыеву, выкладчыцу беларускай і рускай мовы і літаратуры. У 1995 годзе старшынёю рады Пінскай рэгіянальнай арганізацыі ТБМ абралі сп. В.Савіча.

Час пасля рэферэндуму 1995 г. быў не вельмі спрыяльны для грамадскай дзейнасці. Кіраўнікі ўсіх рангаў былі запалоханыя і не вельмі ішлі на кантакты. Тым не менш, кіраўніку арганізацыі ўдалося знайсці маленькі закуточак у доме культуры, дзе збіраліся раз на тыдзень і абмярвоўвалі свае справы. Праз некаторы час быў знойдзены добры пакой для ТБМ у Доме тэхнічнай творчасці. Працавалі шмат: ладзілі сустрэчы з вядомымі пісьменнікамі і бардамі, падпісвалі бібліятэкі на “Наша слова”, распаўсюджвалі гістарычную і папулярную беларускую літаратуру, чыталі лекцыі, прымалі ўдзел у пікетах, мітынгах, былі назіральнікамі на выбарчых участках, збіралі подпісы ў падтрымку нацыянальнага ўніверсітэта, у абарону беларускамоўнага ліцэя ў Мінску і інш. Напрыканцы 1996 г. ініцыявалі стварэнне Таварыства Беларускай Школы.

Найбольш плённым быў экскурсійны накірунак дзейнасці арганізацыі. У 1998-2001 гг. у Пінску адбываўся бум у гэтай справе. Сябры ТБМ, якія скончылі курсы экскурсаводаў (сярод іх і сп. В.Савіч), праводзілі гістарычныя экскурсіі па горадзе, па раёне і па ўсёй Беларусі.

Пасля чарговых выбараў 2001 г. у шэрагах сяброў ТБМ адчуваўся спад, было пэўнае расчараванне. Падчас справаздачна-выбарчай канферэнцыі ў студзені 2002 г. сп. В.Савіч пакінуў сваю пасаду старшыні, узяўшы самаадвод. Дзейнасць па папулярызацыі беларускай мовы прыхільнікі і сябры ТБМ вядуць індывідуальна, або праз удзел у Пінскай раённай арганізацыі ТБМ.

В.У.Савіч.

Нарадзіўся 14 красавіка 1955 г. у Пінску. Скончыў сярэднюю школу ў 1972 г., паступіў у індустрыяльна-педагагічны тэхнікум. З 1973 па 1975 гг. служыў у войску. Тэхнікум скончыў у 1977 г., працаваў па размеркаванні ў г. Рэчыца ў тэхнічнай вучэльні нафтавікоў, у 1979 г. вярнуўся ў Пінск. Працаваў у спецыялізаваным мантажна-наладачным упраўленні інжынерам, затым у праектным інстытуце “Саюзгіпрамеліавадгас”. Падчас працы ў інстытуце ўдзельнічаў у спартовых спаборніцтвах, у мастацкай самадзейнасці, быў рэдактарам аддзелаўскай газеты.

У чэрвені 1986 г. зрабіў адзіночнае падарожжа на самаробным каяку па рэках Стыр, Прыпяць і Цна. У 1995 г. спрычыніўся да стварэння ТБМ у Пінску. З 1995 па 2002 г. з’яўляўся старшынёй Пінскай рэгіянальнай арганізацыі ТБМ. Па асабістым сведчанні, гэты перыяд быў найбольш насычаны грамадскай дзейнасцю і спрыяльны для фармавання светапогляду і пашырэння кругагляду. У 1998 г. скончыў курсы экскурсаводаў, правёў шмат экскурсій, займаўся фатаграфіяй і літаратурнай дзейнасцю.

З 2008 г. працуе ў архітэктурна-будаўнічай майстэрні “МАРС”.

Жанаты, мае трох сыноў.


← вярнуцца ў навіны